Ցմահ բանտարկյալ

Հորիզոնական-միջօրեական սեղմ օղակներում

(Նայեցե՛ք մի պահ այս գըլոբուսին)

Խեղճ Երկրագունդն է կապվել-կապանքվել:

Եվ չկա ո՛չ մի պետքական կացին, ուրագ կամ սղոց:

Ու երբ պարապ եմ

(Այսինքըն` երբ ինքըս ինձ հետ եմ,

Այսինքըն` երբ ես եմ իսկական),

Ատամներով եմ շարունակ կրծում

Ցմահ բանտարկված այս երկրագնդի

Ցանցը երկաթե`

Ապավինելով ծով բարությանն իմ`

Եվ բարությունից շատ ավելի մեծ համբերությանը:

Բայց ես ո՛չ մի կերպ,

Ո՛չ մի հրաշքով

Չե՜մ կարող ապրել Աստվածաշնչի հերոսների չափ,

Ո՛չ 300, ո՛չ 100 տարի:

Ուրեմըն դուք էլ, որ մարդ եք կոչվում,

Դո՜ւք էլ օգնեցեք ձե՛ր ատամներով,

Թերևս ազատենք

Ցմահ վանդակված այս խեղճ-անճարին...

10. XI. 65
Չանախչ

Лайк

Сохранить

Хочу почитать

Будьте первым, кто оставит комментарий по этому поводу

Ятук Музыка

Осенний пейзаж