Хачик Даштенс

Լեռան ծաղիկները

Ես ձեզանից լեռան ծաղիկներ եմ ուզում,

- Մայրը ասաց մի օր երկու որդիներին:

Եվ մանուկներն իսկույն մագլցեցին սարեր,

Որ իրենց մոր ուզած ծաղիկները բերեն։

Մեծը լեռան կողից շորթեց մի բուռ կակաչ,

Քարուտներում բացված անթիվ լվածաղիկ,

Փոքրը ստորոտից դիմեց դեպի գագաթ,

Որ ամենից սիրուն ծաղիկները քաղի։

Այդպիս ամեն ծեգին երկու եղբայրն ուրախ

Բարձրանում էին սարը, որ նոր փնջեր բերեն,

Մեծը կանգ էր առնում ցածրիկ բլուրներին,

Փոքրը համառորեն միշտ ձգտում էր վերև։

Ծերպից ծերպ էր անցնում այդ անհանգիստ տղան,

Որոնելով անվերջ նոր ծաղիկներ լեռան,

Մի անծանոթ տուղտի կամ շուշանի համար

Կռանում էր ահեղ անդունդների վրա։

Մեծը գյուղ էր գալիս միշտ կեսօրից առաջ,

Մի ահագին փնջով, աղաղակով, կանչով,

Փոքրը տուն էր դառնում ուշ գիշերվա ժամին,

Լուռ անցնելով քնած խրճիթների մոտով։

Մեծը վերադարձին մի ցից սարի նստած

Դասավորում էր նույն ծաղիկները չնչին,

Ժողովում էր փոքրիկ ընկած շուշանները

Եվ խառնում էր նրանց իր ահագին փնջին։

Մեծ եղբայրը մեռավ թոնրի շրթին պառկած

Կակաչներով ներկած ամբողջ դուռ ու տանիք,

Եվ թաղեցին նրան գյուղապետի կողքին,

Զանգակատան առաջ, հանգիստ ու երջանիկ։

Փոքրի դիակը սարի հովիվները գտան

Եվ ուսերին դրած գյուղը բերին լռիկ,

Նա իր ձեռքում բռնած ուներ մի նոր ու թարմ,

Մի լեռնային չքնաղ ու անծանոթ ծաղիկ։

Եվ ոտքերին ձյուն կար անապական լեռան,

Եվ արյուն կար սառած կրունկների վրա,

Եվ շուրթերին ժպիտ, կարծես ասում էր նա.

«Մայր իմ, քեզ սիրեցի և քեզ համար մեռա» ։

Բանաստեղծը նա է, ով մեծ եղբոր նման

Չի հավաքում ընկած շուշանները ճամփի,

Եվ չի դասավորում միշտ նույն ծաղիկները

Միշտ միևնույն փնջում, որ իր մորը խաբի։

Բանաստեղծը նա է, որ փոքր եղբոր նման

Միշտ գալիս է մութին և գնում է շաղին,

Եվ ընկնում է դաժան ձյուների մեջ լեռան,

Իր ձեռքի մեջ բռնած մի հազվագյուտ ծաղիկ։

1940

Лайк

Сохранить

Хочу почитать

Будьте первым, кто оставит комментарий по этому поводу

Ятук Музыка

Элен Йолчян

Новое небо для Луны

Цветы Востока

Играть онлайн

Поддержите нас! Покупайте наши товары, созданные на основе произведений искусства, в нашем онлайн-магазине.

Магнит Гора Сипан с острова Ктуц КУПИТЕ СЕЙЧАС

Открытка Армянские миниатюры КУПИТЕ СЕЙЧАС

Брошь Натюрморт с цветком КУПИТЕ СЕЙЧАС

Брошь Гора Сипан с острова Ктуц КУПИТЕ СЕЙЧАС

Магнит Джаджур КУПИТЕ СЕЙЧАС

Брошь Стремление КУПИТЕ СЕЙЧАС

Магнит Стремление КУПИТЕ СЕЙЧАС

Игра Морской бой в стиле Айвазовского КУПИТЕ СЕЙЧАС