Paruyr Sevak

Իրերի բարությունն ու չարությունը

Կարծում եք, թե մե՞նք, մե՞նք ենք մտովին

Լուռ մենախոսում մեն-մենության մեջ:

Ո՛չ.

Մինչև անգամ մեր լռին խոսքում

Իրերն են մեզ հետ զրուցում անվերջ,

Այդ բարինե՜րը,

Որովհետև մեզ խղճում են նրանք:

Եվ այդ պահերին

Կենդանանում է

Ու շնչավորվում ամեն իր այնպե՛ս,

Որ մինչև անգամ մենության մեջ էլ մեզ մենակ չզգանք

Եվ չապրենք կիսատ ու պռատ կյանքով:

Նրանք բարի են

Ու խղճում են մեզ`

Մեն-մենակներիս:

Եվ մենակության այդ պահերին է,

Որ մենք չենք ցրվում չորս կողմի վրա`

Սալահատակին վերևից ընկած կույր կաթիլի պես,

Այլ ներամփոփվում,

Կենտրոնաձգվում ձախից ու աջից

Եվ ստանում ձևն ա՛յն մսե խաչի,

Որ ունի մարդը,

Եթե փորձում է թռչել կամ լողալ:

Իսկ մենության մեջ մարդն ի՜նչ էլ անի

Թռիչք չէ՞ կամ լող:

Իսկ մենության մեջ` լողա՜ս թե թռչե՛ս,

Մե՜կ է` չլռել չե՛ս կարողանա...

Ու լռությունը,

Որ համատարած մի ականջ է լոկ

Եվ ունի միայն մե՛կ զգայարան` լոկ լսողություն,

Այդ լռությունը ուռչում է անվերջ,

Ասես մանկական փուչիկի նման,

Լցվելով ուռչում-ուռչելով լցվում

Մեր անլսելի խոսք ու զրույցով

Ու հետզհետե դառնում վիթխարի՜ մի օդապարիկ,

Որ եթե հանկարծ կամենա պոկվել`

Մե՛զ էլ, մեր տո՛ւնն էլ վերև կհանի

Ու-թի՜ռ-կտանի՛...

Բայց լռությունը,

Որ համատարած մի ականջ է լոկ,

Եվ ունի միայն մե՛կ զգայարան` լոկ լսողություն,

Որքան ուռչում է` թանձրանում նույնքան

Ու դառնում կարծես

Մեզ համար մի նո՛ր՝ երկրո՜րդ... հայրենիք.

Հայրենիքի պես չփոխատրվող,

Հայրենիքի պես չփոխադրվող...

Դրսում

Երևի աստղերն են ելնում` ողջ շքախմբով,

Իջնում է նորից

Մի ճշմարտապես աստվածաշնչյան գիշեր

Պարզունակ ու նույնքան խորունկ,

Որ ով ուժ ունի` վայելի իրեն:

Դրսում

Երևի կենտ-կենտ լույսերը փորձում են խախտել

Նախապատմական վեհ լրջությունը Մեծն Խավարի:

Դրսում...

Մե՜զ ինչ, թե ի՞նչ է կատարվում դրսում:

Մենք ներսում

Մենակ ենք, բայց և մենակ չենք կարծես.

Իրերը բարի

Ամե՜ն ինչ մեր շուրջ կենդանացնում են ու շնչավորում,

Որպեսզի... մենք էլ հասնենք հենց իրենց առքին ու փառքին.

Թե իր են իրենք,

Մենք էլ` մենության ժամին ահարկու,

Մենք էլ` իրենց պես` դառնանք իր,

Այսինքըն` իր - ականանք:

28.X.1965թ.
Չանախչի

Save

Want to read

Be the first who will comment on this

Yatuk Music

Elen Yolchyan

New sky for Moon

Firdousi reads the poem "Shah-Name" to Shah Mahmud Ghaznavi

Play Online